काठमाडौं ।

माधव नेपालको साथ् छाडेर अन्तिम समयमा एमालेमै बसेका नेकपा एमालेका प्रभावशाली नेता घनश्याम भुसालको गृहजिल्ला रुपन्देहीमै बेहाल हुने भएको छ । महाधिवेशनको चटारोमा रहेको एमालेले वडा र पालिकाको अधिवेशन सक्दा रुपन्देहीमा भुसालको अवस्था चिन्ताजनक बनेको छ

विज्ञापन

विज्ञापन

एमालेले रुपन्देहीका १५ पालिकामा सर्वसम्मत रुपमा नेतृत्व चयन गरेको छ। केही विवाद भएपछि सिद्धार्थनगर नगरपालिकामा मात्रै मतदानबाट नयाँ नेतृत्वको छिनोफानो गरिएको छ।

एमालेका पिल्लर मानिएका ओलीपक्षका नेता विष्णु पौडेलले भुसाललाई रक्षात्मक बनाएका छन् । सिद्धार्थनगरमा एमाले उपमहासचिव समेत रहेका पौडेल र घनश्याम भुसाल पक्षीय उमेदवारहरू प्यानल बनाएर चुनावी मैदानमा आएका थिए। मतदानमा कुल २ सय ३३ मत खसेको थियो। जसमा पौडेल पक्षका चक्रबहादुर थापा १ सय ६१ मतसहित विजयी भए।

भुसाल पक्षका थानेश्वर पौडेल १ सय ४ मतको फराकिलो अन्तरले पराजित भएका छन् । घनश्याम निकटका थानेश्वरले केबल ५७ मत मात्रै ल्याए। उपाध्यक्ष र सचिवमा पनि विष्णु पौडेल पक्षकै अर्जुनकुमार गिरि र नारायण प्रसाद भण्डारी विजयी भएका छन्।

सिद्धार्थनगर रुपन्देही क्षेत्र नम्बर २ मा पर्दछ। यो एमाले उपमहासचिव भुसालको चुनावी क्षेत्र पनि हो। भुसालनिकट नेताहरु उनकै निर्वाचन क्षेत्रमा फराकिलो अन्तरले पराजित भएपछि उनी थप तनावमा देखिएका छन् ।

तिलोत्तमा नगरपालिका घनश्याम भुसालको गृहनगर हो। यो नगरपालिकाका केही क्षेत्र उनको निर्वाचन क्षेत्रमा पनि पर्दछ। यहाँ पनि भुसाल पक्षका उमेदवार एमालेको नेतृत्वमा अटाउन सकेनन्।

नगर अधिवेशनबाट पौडेल पक्षका तामनाथ पाण्डे अध्यक्षमा चयन भए। तानातानबीच भुसाल पक्षीय सुरेन्द्र श्री नेतृत्वमा आउन सकेनन्। उनलाई जिल्ला कमिटीमा समेट्ने गरि सहमति भएको एमाले रुपन्देहीका एक नेताले बताएका छन्।

अध्यक्षमै दाबी गरिरहेका नेत्र बनलाई उपाध्यक्ष र मीनप्रसाद पोखरेललाई नगर सचिव बनाइएको छ। दुवै जना अध्यक्ष केपी ओली पक्षका हुन्। रुपन्देहीका अन्य पालिकामा सर्वसम्मत नेतृत्व चयन भएको छ। पालिकाको नेतृत्व तहमा उपमहासचिव पौडेलपक्षकै आएका छन्।

भुसाल पक्षका थोरै मात्र कार्यसमितिमा समेटिएका छन्। रुपन्देहीका भुसाल पक्षीय धेरै नेता कार्यकर्ताले ओलीलाई नै साथ दिँदै आएका थिए। अहिले उनीहरुलाई पौडेलले संरक्षण दिएका छन्।