महाधिवेशन प्रतिनिधि छनौटमा देशैभर बढारिएको नेकपा एमालेको ‘१० भाइ’ समूहले कैलालीमा भने संस्थापनको निर्णय अस्वीकार गरेको छ । सर्वसम्मतिका नाममा प्रतिनिधि छनौटमा ओलीपक्षले एकलौटी गरेको भन्दै सो समूहले छुट्टै भेलासमेत बोलाएको छ ।

पाँच वटा संघीय निर्वाचन क्षेत्र रहेको कैलाली क्षेत्र नम्बर २ मा हिजो ओली पक्षले नौ जना महधिवेशन प्रतिनिधि छनौट गरेको घोषणा भएको थियो । त्यसलाई चुनौती दिँदै लम्किचुवा नगरपालिकाका मेयरसमेत रहेका एमाले सुदूरपश्चिम प्रदेश कमिटी सदस्य महादेव बजगाईंले आज छुट्टै भेला बोलाएका हुन् । भेलाले छुट्टै प्रतिनिधि चयन गर्ने बताइएको छ ।

विज्ञापन

बजगाईंले छुट्टै भेला बोलाएको पुष्टि गरेका छन् । प्रतिनिधि चयनमा ओलीपक्षले एकलौटी गरेपछि अर्को भेला बोलाउनु परेको उनले दाबी गरे । उनका अनुसार प्रतिनिधिका लागि ४१ जनाको उम्मेदवारी परेको थियो । तर, ओलीपक्षले सर्वसम्मतिका नाममा आफू अनुकूल हुने गरि प्रतिनिधि छनोट गरेपछि अर्कोपक्ष अलगै भेला गर्न बाध्य भएको हो ।

विज्ञापन

‘प्रतिनिधिका लागि ४१ जनाको उम्मेदवारी परेको थियो । तर, न सहमति भयो न निर्वाचन । यहाँबाट धनगढी गएर होटलको कोठामा सीमित व्यक्ति बसेर उहाँहरुले प्रतिनिधि चयन गर्नुभयो । त्यसलाई स्वीकार गर्न सकिँदैन भन्ने कार्यकर्ताको कुरो आएपछि हामीले छुट्टै भेला बोलाएका हौँ । हामी अर्को प्रतिनिधि छनोट गर्छौँ’, उनले भने ।

एमाले जबज र प्रतिस्पर्धाको श्रेष्ठतामा विश्वास गर्ने पार्टी भएकाले निर्वाचनमाफर्त नै प्रतिनिधि चयन गर्ने पनि उनको भनाइ छ । बजगाईंले ओली पक्षले पार्टीको लेटरप्याड दुरुपयोग गरेको आरोपसमेत लगाएका छन् । जिल्ला अध्यक्ष रतन थापाको नेतृत्वमा पार्टीका नाममा मनपरी निर्णय गरिएको भन्दै उनले आक्रोश पोखे ।

बजगाईं उपाध्यक्ष भीम रावल निकट मानिन्छन् । पछिल्लो समय १० बुँदे कार्यान्वयनलाई लिएर रावल र अध्यक्ष ओलीबीच विवाद छ । कैलाली–२ मा छुट्टै भेला बोलाउने निर्णयलाई सोही विवादसँग जोडेर हेरिएको छ । तर मेयर बजगाईंले भने यसमा उपाध्यक्ष रावलको कुनै भूमिका नरहेको बताए ।

‘भीम कमरेडको कुरा हैन, कार्यकर्ताको मागअनुसार भेला गर्न लागिएको हो’, उनले भने ।