जनता समाजवादी पार्टी(जसपा)का अध्यक्ष उपेन्द्र यादवले गत असार ३० गते संघीय परिषद् अध्यक्ष बाबुराम भट्टराई सहित नौ जनालाई पार्टीबाट निष्काशन गरे । वैकल्पिक शक्ति बनाउने उद्घोष गर्दै २०७२ साल असोज ९ गते तत्कालीन नेकपा एकीकृत माओवादी छोडेका बाबुराम नयाँ शक्ति हुँदै जसपासम्म आइपुग्दा अहिले पार्टीविहीन अवस्थामा पुगेका छन् । जसपाबाट निकालिएपछि बाबुरामले असार ३१ गते एक विज्ञप्ति जारी गर्दै आफ्नै नेतृत्वमा पार्टी पुनर्गठन गर्ने बताएका छन् ।

तर, बाबुरामका पूर्व सहकर्मी तथा नेकपा माओवादी केन्द्रका नेताहरूले आफ्नै पुरानो घर फर्किन सुझाव दिएका छन् । बाबुरामको लिगेसी माओवादीमै भएकाले पुरानै पार्टीमा फर्किन पार्टी स्थायी समिति सदस्य एवम् सुदूरपश्चिम इन्चार्ज खगराज भट्टले अनुरोध गरेका छन् । ‘उहाँको बौद्धिकता कार्यक्षमता, इतिहास र योगदानका विषयमा राष्ट्रिय अन्तर्राष्ट्रिय जगत परिचित छ । मैले बारम्बार भन्ने गरेको छु । तपाईंको लिगेसी जहाँ छ, तपाईंको इतिहास र योगदान जहाँ छ, त्यसैले तपाईंलाई न्याय र मूल्यांकन गर्न सक्छ । त्यसैले फर्कनुहोस्,’ रातोपाटीसंग कुरा गर्दै भट्टले भने, ‘माओवादीहरू सबै एउटै केन्द्रमा आउनुपर्छ । देशभक्त प्रगतिशील र अग्रगमनका पक्षधरहरू एउटै केन्द्रमा आउन जरुरी छ । अरु कुनै प्रयोग र परीक्षणको निरन्तरता राष्ट्रका लागि र उहाँ आफ्नै टिमका लागि फाइदाजनक हुन सक्दैन ।’ माओवादीका अधिकांश नेताहरूले बाबुराम पुरानै पार्टीमा फर्किए नेता मानेर बस्न कुनै आपत्ति नहुने जिकिर गरेका छन् । यसअघि समेत आफ्नै पार्टीको सिनियर नेता भएकाले अब पनि पार्टीमा फर्किँदा उत्तिकै सम्मान हुने बताएका छन् ।

विज्ञापन

यता राजनीतिक विश्लेषक हरि रोका भने बाबुरामले माओवादी हुँदै जसपासम्म आउँदा राजनीतिक र वैचारिक रुपमा धेरै परीक्षण गरिसकेकाले अब रिटायर्ड जीवन बिताउँदा उपयुक्त हुने सुझाव दिन्छन् । राजनीतिबाट विश्राम लिएर बाबुरामले आफ्नो बौद्धिकता देश र समाजका लागि खर्च गर्दा फलदायी हुने रोकाले भनाई छ । अहिले भएका काँग्रेस, एमाले वा माओवादी लगायत अन्य कुनै पार्टीमा गए बाबुरामले आफ्नो स्थान लिन कठिन हुने रोकाको विश्लेषण छ ।

विज्ञापन

अर्का राजनीतिक विश्लेषक एवम् नागरिक अभियान्ता श्याम श्रेष्ठले बाबुरामले ७० प्रतिशत श्रमजीवी वर्गको प्रतिनिधित्व गर्ने पार्टी बनाए त्यसको अर्थ हुने जिकिर गरे । अहिले भएका पार्टीहरू असफल भएको भन्दै श्रेष्ठले गरिखाने वर्गको पार्टी निर्माण गरेमा बाबुरामलाई इतिहासले मूल्याङ्कन गर्ने बताए ।