काठमाडौं महानगरपालिकाका मेयर बालेन्द्र शाह त्रिपुरेश्वरस्थित विश्व निकेतन माध्यमिक विद्यालयमा पुगेका छन् । घरदैलो कार्यक्रमअन्तर्गत उनी शुक्रबार त्यहाँ पुगेका हुन् । उनले १३५ शिक्षक र कर्मचारीहरूको संयुक्त प्रयासबाट सो विद्यालयले आफूलाई शैक्षिकस्तरको मानक बनाएको बताएका छन् ।

‘त्रिपुरेश्वरको राहदानी विभागको पछाडि एउटा स्कुल छ, विश्व निकेतन माध्यमिक विद्यालय । यसको स्थापना २००३ सालको माघ १९ मा भएको थियो । अहिले यसमा कक्षा १ देखि १२ सम्म पढ्ने विद्यार्थीको संख्या ४ हजार छ,’ मेयर बालेनले सामाजिक सञ्जालमा लेखेका छन्, ‘१ सय ३५ शिक्षक र कर्मचारीहरुको संयुक्त प्रयासबाट यो स्कुलले आफुलाई सरकारी शैक्षिक स्तरको मानक बनाएको छ ।’

विज्ञापन

विश्व निकेतनले विद्यालयको गुणस्तरका लागि मानक र उदाहरणहरू त हाम्रै महानगरमा पनि छन् भन्ने आफूलाई लागेको उनको भनाइ छ । ‘महानगरका लागि शिक्षाक्षेत्रको यो नमुना उपयोगी हुनेछ । याद गर्नैपर्छ, सरकारी स्कुललाई प्राथमिकतामा नराखी, सरकारी स्कुलको शिक्षा सर्वसुलभ र गुणस्तरीय नहुन्जेल देश अगाडि बढ्छ भन्ने सोच्नु दिवास्वप्न मात्र हो,’ उनले लेखेका छन् ।

विज्ञापन