राष्ट्रिय सभाका अध्यक्ष गणेशप्रसाद तिमिल्सिनाले स्वतन्त्र उम्मेदवारले जित हासिल गरे पनि काम गर्न नसक्ने बताएका छन् ।

शनिवार काठमाडौंमा आयोजित ‘अबको दृष्टि, स्वाभिमानसहितको समृद्धि’ विषयक कार्यक्रममा बोल्दै अध्यक्ष तिमिल्सिनाले बहुदलीय व्यवस्थामा स्वतन्त्र उम्मेदवारले जितेर संसदमा केही काम गर्न नसक्ने बताएका हुन् । उनले स्वतन्त्र उम्मेदवारले संसद्मा बोलेर अलिकति चेतना जगाउन सके पनि आमरूपमा कुनै परिवर्तन ल्याउन नसक्ने बताए । उनले आफू राष्ट्रिय सभा अध्यक्ष भएर पनि नियम, कानूनको सीमाका कारण आम रुपमा परिवर्तन ल्याउन नसकेको भन्दै स्वतन्त्र सांसदले झनै नसक्ने बताए ।

विज्ञापन

कार्यकारी अधिकार नभएको ठाउँमा गर्ने कामहरू कम हुने उनको भनाइ थियो । अध्यक्ष तिमिल्सिनाले पार्टीको विकल्प स्वतन्त्र उम्मेदवार नभएको भन्दै सबैलाई पार्टीमा आवद्ध हुन आग्रह गरे । उनले पार्टीलाई नै सही मार्गमा हिँडाउन भूमिका खेल्न आग्रह गरे ।

विज्ञापन

‘गएको स्थानीय चुनावमा केही स्वतन्त्र उम्मेदवारले जित्नुभएको छ । स्थानीयमा त बहुमत अल्पमत निर्णय प्रक्रियामा चाहिन्छ तर त्यो चल्छ । तर, प्रदेश सरकार बन्न त्यहाँ त सरकार बनाएर चेन्ज ल्याउने । एउटा सांसदले अलिकति चेतना जगाउन सक्छ । तर, उसले आम रुपमा चेन्ज ल्याउन सक्दैन’, उनले भने, ‘म राष्ट्रिय सभा अध्यक्षले सकेको छैन । सांसदले कहाँ सक्नुहुन्छ ? कार्यकारी अधिकारसहितको नभएको ठाउँहरुले गर्ने ठाउँ कम हुन्छ, काम गर्ने कुराहरु । एकजना सांसद स्वतन्त्र आउनुहुन्छ, बोल्नुहुन्छ । बोलेको बोलेकै गर्नुहुन्छ । तर अर्को पटकबाट निराश भएर सकिँदो रहेनछ भनेर अरुलाई पनि निराश बनाउनु हुन्छ ।’

अघिल्लो पुस्ताका नेताहरुमा त्याग गर्ने क्षमता भएपनि निर्माण गर्ने कुरामा कमजोरी रहेको उहाँको भनाई छ । अब देशमा विद्रोहको आवश्यकता नरहेको भन्दै उहाँले विद्रोह गर्नेलाई होइन सिर्जना गर्नेलाई भोट दिनुपर्ने बताउनुभयो ।