अभिनेत्री मिरुना मगरले जेठ १५ गते सिभिल हलमा आफूलाई दुर्व्यवहार गरेको भन्दै बौद्ध भिक्षु फुर्पा तामाङमाथि थप्पड हानेर प्रहरीको जिम्मा लगाएपछि यो घटनाले ठूलै तरंग ल्यायो । विना गल्ती मिरुनाले तामाङलाई थप्पड हानेको भन्दै बौद्ध सुमदायका व्यक्तिहरु सडकमै उत्रिए । फिल्म ‘कबड्डी ४’को पोस्टर जलाउँदै मिरुनाले तामाङसँग माफी माग्नु पर्ने भन्दै नाराबाजी समेत भयो ।

मंगलवार दिउँसो मिरुनामाथि दुर्व्यवहारको आरोपमा पक्राउ परेका तामाङ तीन हजार धरौटीमा छुटे । त्यसलगत्तै मिरुना र फुर्पाले प्रत्यक्ष भेट गर्दै आ-आफ्नो तर्फबाट भएको गल्तीका लागि माफी मागे । फुर्पाले गल्ती स्वीकार गर्दै माफी मागेपछि मिरुनाले भाई सम्झेर माफी दिइन् । उनीहरुले आगामी दिनमा यो विषयमा विवाद र टिका-टिप्पणी नगर्ने भन्दै मिलापत्रमा हस्ताक्षर समेत गरे ।

विज्ञापन

फुर्पासँग मिलापत्रपछि मौनता साँधेर बसेकी मिरुनाले बिहीवार फेसबुकमा एक वक्तत्व जारी गर्दै फूर्पा तामाङले आफूबाट भएको दुर्व्यवहारको लागि निःस्वार्थ रूपमा माफी मागेकोले आफूले माफी स्वीकार गरेको बताएकी छन् । उनले जेठ १५ गते भएको कार्य कुनै धर्म र समाज विरुद्ध नभइ व्यक्ति विरुद्ध रहेको भएपनि यो घटनाबाट दुखित हुने बृहत समुदायप्रति क्षमायाचना गरेकी छन् ।

विज्ञापन

उनले लेखेकी छन्, ‘तपाईंहरूमध्ये धेरैले मसँगग बाँड्नु भएको मेरा जस्तै घटनाका कथाहरूबाट म अत्यन्तै प्रभावित भएकी छु । यो समयमा यी कथाहरूबाट साहस जुटाउन सकेकोमा म तपाईंहरूको प्रंशसा नगरी रहन सक्दिनँ ।’ उनले चुपचाप कहिल्यै दु:ख नसहन र गलतको विरुद्ध लडन पनि आग्रह गरेकी छन् । कुनै पनि सही कार्य गर्नको निम्ति समय गलत नहुने उनको तर्क छ ।