काठमाडौँ । एमालेका अध्यक्ष केपी शर्मा ओलीले आफू नेतृत्वको सरकार ढाल्न भूमिका खेल्ने जति सबै एमाले विरोधी भएको बताएका छन् । उनले विरोधीहरूको कुनै विचार नहुने भन्दै सरकार ढाल्न सहयोग गर्नेहरू पनि एमाले विरोधी भएको बताएका छन् ।

तत्कालिन ओली नेतृत्वको सरकार ढाल्न एमालेकै मध्यमार्गी भनिएका नेताहरूले पनि हस्ताक्षर गरेका थिए। एमाले विभाजन हुँदा मध्यमार्गी बनेर एमालेमै बसेका नेताहरूमध्ये २ जना बाहेक सबैले ओली सरकार ढाल्न सर्वोच्चमा दिएको निवेदनमा हस्ताक्षर गरेका छन् । यसै घटनालाई लक्षित गर्दै ओलीले आफू नेतृत्वको सरकार ढाल्ने सबै एमाले विरोधी भएको बताएका थिए ।

विज्ञापन

विधान महाधिवेशनको समापन सम्बोधनमा आइतबार ओलीले विरोधी को हुन् भन्नेबारे शास्त्र पढ्न आवश्यक नभएको र एमालेसँग लडराखेका जति विरोधी भएकोबारे स्पष्ट हुन कार्यकर्ताहरूलाई भनेका हुन् ।

विज्ञापन

‘हाम्रो सरकार ढाल्न ज-जसले भूमिका खेले, जसले हामीलाई प्रतिपक्षमा पुर्‍याए, कम्युनिस्ट सरकार ढालेर कांग्रेसको नेतृत्वमा सकरार बनाउनु अग्रगमन र क्रान्तिकारिता हो भनेर गए, एमालेको सरकार ढालेर क्रान्ति गर्‍यौं भने,’ ती एमालेका विरोधी भएको ओलीको भनाइ थियो ।

ओलीले पार्टीको विरोधी को हो र को होइन भनेर अल्मलिन जरुरी नभएको पनि बताए । उनले कसैले गालामा हान्यो भने सिद्धान्त हेर्न नहुने बताए । त्यसरी गालामा हान्ने व्यक्ति विरोधी भएको उनको भनाइ थियो । ‘यति साह्रो शास्त्रवादी हुनु आवश्यक छैन । जो तपाईंसँग लडिराखेको छ त्यो विरोधी हो,’ उनले भने ।

एमालेमा बिग्रिएका मान्छेहरू बाहिरिएको ओलीको भनाइ थियो । उनले सप्रिएका जति सबै एमालेमै रहेको पनि बताए ।

कतिपय स्थानीय तहमा रहेका नेता र कार्यकर्तालाई भ्रम र अलमलमा पारेर अर्कै पार्टीले लगेको हुन सक्ने भन्दै तिनलाई फिर्ता ल्याउन भूमिका खेल्न ओलीले निर्देशन दिए । एमाले काम लाग्दैन भनेर केही मान्छेले निर्वाचन आयोगमा नयाँ दल दर्ता गरी खेलेको ओलीको भनाइ थियो ।