सत्तारुढ दल नेकपा (माओवादी केन्द्र) ले पार्टीको पदाधिकारी चयन प्रक्रिया अघि बढाउने तयारी गरेको छ । माओवादी केन्द्रको असार १५ मा बस्ने केन्द्रीय समितिको बैठकले पदाधिकारी चयनको निर्णय गर्ने सम्भावना बढी रहेको स्रोतले जनायो । माओवादी केन्द्रका अध्यक्ष पुष्पकमल दाहालले पदाधिकारी चयनका लागि निकट नेताहरुसंग छलफल समेत गरिसकेका छन् । उनले पार्टीका सिनियर र युवा नेताहरुसंग छलफल गरेका हुन् ।

माओवादीले यसअघि चुनाव नजिक आएको भन्दै समय लाग्ने भएकाले पदाधिकारी चयन हुन नसकेको बताएपनि खासमा महासचिवका आकांक्षीहरु धेरै भएपछी अध्यक्ष दाहाललाई अफ्ठेरो परेर पदाधिकारी चयन स्थगित गरिएको थियो । महासचिवका लागि नेताहरु वर्षमान पुन,शक्तिबहादुर बस्नेत,जनार्दन शर्मा,पम्फा भुसाल र देव गुरुङ आकांक्षी थिए ।

विज्ञापन

माओवादी केन्द्रमा पदाधिकारी मात्र होईन पार्टीको स्थायी कमिटी र पोलिटब्युरो समेत गठन भएको छैन । तर, असारमा बस्ने केन्द्रिय समितिको बैठकले भने पदाधिकारीसहित पार्टीका अरु संरचना टुंगो लगाउने सम्भावना छ । माओवादी अध्यक्ष दाहालले पार्टी महासचिवमा नेता वर्षमान पुनलाई अघि बढन संकेत दिएको स्रोतको दावी छ । उनले पुनलाई कार्यकर्ताको विचमा गएर भिज्न भनेका छन् । त्यस्तै नेता कृष्णबहादुर महरासंग सम्बन्ध सुमधुर बनाउन पनि उनले सुझाएको स्रोत बताउंछ ।

विज्ञापन

‘अध्यक्षले महासचिवमा नेता पुनलाई नै संकेत गरिसक्नुभएको छ । त्यसैअनुसार उहांले अहिले मुभ गरिरहनुभएको छ ।’ नेता पुन निकट स्रोतले काठमाण्डौंपाटीसंग भन्यो । पुनले पछिल्लो समय नेता शर्मासंग समेत सम्बन्ध सुधार गरेका छन् । उनको नेता शक्ति बस्नेतसंग सुमधुर सम्बन्ध नै छ ।

नेकपा गठनसंगै शर्मासंग पुनको दुरी बढसंगै बस्नेत र पुन एउटै टिम बनाएर काम गरिरहेका छन् । पुनले आफु महासचिव नहुने हो भने बस्नेतलाई आफुले मान्ने तर शर्मालाई स्विकार नगर्ने यसअघि चीनमा उपचार गर्दा नै बताएका थिए ।

महासचिवका लागि अर्थमन्त्री समेत रहेका नेता जनार्दन शर्मा भने चुनाव लड्न तयार रहेको तर पुनलाई महासचिव मान्न तयार नभएको बताउंदै आएका छन् । माओवादीमा विचको विकल्पका रुपमा नेता बस्नेतलाई समेत अघि सारिएको थियो । तर, उनको समेत सम्भावना कम भएको बताइन्छ । माओवादीमा अध्यक्ष दाहालको सहयोग विना निर्वाचनमा जांदा महासचिव जित्ने सम्भावना कम भएकाले प्रतिस्पर्धी नेताहरुले उनको प्रस्तावमा विरोध गर्ने सम्भावना कम छ ।

माओवादी केन्द्रको पुस १८ मा काठमाण्डौंमा सम्पन्न भएको ८ औ महाधिवेशनले २४६ जनाको अपूर्ण केन्द्रीय कमिटी चयन गरेको थियो । माओवादीको केन्द्रीय समितिको बैठकले अध्यक्षमा पुष्पकमल दाहाललाई चयन गरेपनि अरु पदाधिकारी भने चयन गर्न सकेको थिएन ।

माओवादीमा पदाधिकारी मात्र होईन केन्द्रीय कमिटीको मनोनित हुन् बांकी ९७ सिटमा गरिएको नियुक्ति समेत विवादमा छ । माओवादी अध्यक्ष दाहालले प्रस्ताव गरेको ९७ जनाको नाममध्ये बैठकले ५० जनाको मात्र नाम अनुमोदन गरेको थियो ।

माओवादीले आठौँ महाधिवेशनबाट संशोधन गरेको विधान अनुसार पार्टीमा १५ पदाधिकारी र २९९ केन्द्रीय सदस्य रहने व्यवस्था छ । माओवादी पदाधिकारीमा एक अध्यक्ष, एक वरिष्ठसहित ७ जना उपाध्यक्ष, एक महासचिव, दुई उपमहासचिव, तीन सचिव र एक जना कोषाध्यक्ष रहने व्यवस्था गरेको छ ।

माओवादीमा पदाधिकारी चयनका लागि दुई पटक केन्द्रीय कमिटीको बैठक बसेपनि आकांक्षीहरु धेरै हुंदा सहमति जुट्न सकेको थिएन । २० फागुनमा बसेको केन्द्रिय समितिको बैठकले पदाधिकारी चयन गर्न नसकेपछी स्थानीय तहको निर्वाचनपछी पदाधिकारी चयन गर्ने निर्णय माओवादीले गरेको थियो ।