काठमाडौं।

विज्ञापन

विज्ञापन

दुई दुई पटक संसद् विघटन गरेको एमालेका लागि आगामी निर्वाचन अग्निपरीक्षा सावित हुने निश्चित छ ।

किनभने यस बीचमा एमाले अध्यक्ष केपी ओलीले संसदीय लोकतन्त्र मास्न र संविधान विपरीत जे जे गतिविधि गरे त्यसलाई आमजनताले राम्रो मानेका छैनन् ।

संसदलाई पाँच वर्ष चल्नै नदिने, संसद् बैठक बीचमै रोकेर अध्यादेशबाट शासन चलाउने ओलीकै कारण संसदीय व्यवस्था बदनाम गरिएको थियो ।

अहिले त्यही एमाले अबको निर्वाचनमा दुई तिहाइ बहुमत ल्याउँछु भनेर गुड्डी हाँक्न छाडेको छैन । जबकि ०७४ को निर्वाचनमा वाम एकताको नारा अघि सारिएको थियो ।

ओलीको क्रेज धेरै थियो । माओवादीले एमालेलाई ठूलो विश्वास गरेर साथ दिएको थियो । तर, यसबीचमा बाग्मतीमा धेरै पानी बगिसकेको छ । वाम एकता ध्वस्त बनेको छ ।

एमाले र माओवादी केन्द्रको एकता खारेज भएको छ । दुई पार्टीबीच शत्रुतापूर्ण व्यवहार छ । एमालेनै चोइटिएको छ । एमालेबाट धेरै नेता कार्यकर्ता बाहिरिएका छन् ।

ओलीले पार्टी र आफ्नो साख सखाप पारेका छन् । ‘साउनमा आँखा फुटेको गोरु सधैं हरियो देख्छ’ भनेझैं झन्डै दुई तिहाइ बहुमत हुँदाहुँदै संसद् विघटन गरेको एमाले अहिले पनि त्यही सपना देखिरहेको छ ।

यदि अहिलेकै गठबन्धन आगामी तीनै तहको निर्वाचनसम्म कायम रहेमा एमालेले धेरै ठाउँमा लज्जास्पद हार बेहोर्नुपर्ने राजनीतिक विश्लेषकहरू बताउँछन् ।

राष्ट्रिय सभा निर्वाचनमै पनि एमालेले त्यो दृश्य देखिसकेको छ । तर पनि पाँच वर्षको जनमत सम्झेर एमाले अहिले पनि बर्बराउन छाडेको छैन ।

यो देशमा पञ्चले पनि शासन चलाएकै हुन् । कांग्रेसले पनि दुई तिहाइ बहुमत ल्याएकै हो । माओवादी केन्द्रले पहिलो संविधान सभा निर्वाचनमा झन्डै आधा संसद् ओगटेकै हो ।

एमालेले पनि ०७४ मा राम्रै सिट हात पारेकै हो । तर, अब ०७९ को निर्वाचनमा पनि त्यही बहुमत आउँछ भनेर सोच्नु एमालेको दिवालीयापनबाहेक केही पनि होइन ।