चितवन।

जगन्नाथ ग्रुप अफ ईन्डष्ट्रिज प्रा.लि चितवनको उत्पादन युरो पेन्टसले जारी आईसीसी टी–२० विश्वकपमा सहभागी नेपाली राष्ट्रिय टिमलाई प्रोत्साहित गर्न पुरस्कार घोषणा गरेको छ । जसअनुसार जारी विश्वकपमा प्रत्येक रन र विकेटमा खेलाडिले युरो पेन्टसको तर्फबाट पुरस्कार प्राप्त गर्नेछन ।

विज्ञापन

विज्ञापन

युरो पेन्टसले जारी विश्वकपमा नेपालको जीतको श्रृंखला अगाडि बढाउन खेलाडीहरूको मनोबल उच्च पार्ने उद्देश्यले पुरस्कारहरूको घोषणा गरेको जनाएको छ । जसमा प्रत्येक रन बनाएबापत रू. तीन सय, प्रत्येक विकेटबापत रू तीन हजार, प्रत्येक चौकाबापत रू. एक हजार, प्रत्येक छक्काबापत रू. दुई हजार, प्रत्येक अर्धशतक बापत रू. ५० हजार र प्रत्येक शतकबापत रू. १ लाख रूपैयाँ नगद खेलाडीले युरो पेन्टसको तर्फबाट प्राप्त गर्नेछन ।

यस पुरस्कार घोषणाले नेपाली खेलाडीहरूलाई उच्च प्रदर्शन गर्न थप प्रोत्साहन मिल्ने विश्वास गरिएको जगन्नाथ ग्रुपका प्रबन्ध निर्देशक केल्बिन शर्माले बताउनुभयो । उहाँका अनुसार जारी टी–२० विश्वकपको सुपर–८ पुग्नासाथ नेपाल क्रिकेट संघ (क्यान) लाई समेत पुरस्कृत गरिनेछ । सुपर–८ मा पुग्न सफल भए दुई लाख, सेमी फाइनलमा पुगे पाँच लाख, फाइनलमा पुग्न सफल भए सात लाख र वल्र्डकप जित्न सफल भए दश लाख दिने घोषणा गरिएको शर्माले बताउनुभयो ।

उहाँले सिमित श्रोत साधनको बाबजुत कडा मेहनत र परिश्रमले नेपाली क्रिकेट टिमले प्राप्त गरेको सफलता स्रहानिय रहेको बताउनुभयो । युरो पेन्टस विगत छ वर्षदेखि आफ्ना उत्पादन हरु बजारमा ल्याएको छ भने नेपाली खेलकुद क्षेत्रको विकासमा सहयात्रा गरिरहेको छ । नेपालले टि–२० विश्वकपको श्रृंखलाअन्तर्गत आफ्नो पहिलो खेल नेदरल्यान्डसँग मंगलबार खेल्दैछ । त्यस्तै टेस्ट मान्यताप्राप्त साउथ अफ्रिका, श्रीलंका र बंगलादेशसँग पनि नेपालले पहिलो चरणमा खेल्ने तालिका छ ।