Advertisement area

  • Skip this

Advertisement area

बिहिबार, साउन ३, २०८१
  • होमपेज
  • Breaking News
  • सालको पातको दुना–टपरी बनाएर मासिक २० हजार आम्दानी
Breaking News

सालको पातको दुना–टपरी बनाएर मासिक २० हजार आम्दानी

कपिलवस्तु । कपिलवस्तु वाणगंगा नगरपालिका–१० पटनाकी दिलकुमारी थापाले दुना–टपरी बेचेर मासिक रु २० हजार कमाइ गरिरहेकी छन्। थापाले विसं २०६६ देखि दुना–टपरी बनाउने पेसा अपनाएकी हुन्।

घरबाट बाहिर निस्कन नखोज्ने उनलाई घरेलु तथा साना उद्योग कार्यालय र एक गैरसरकारी संस्थाले दुना–टपरी बनाउने तालिम दिएको थियो। ‘तालिममा सक्रियतापूर्वक सहभागी भएर दुना–टपरी बनाउने सीप सिकेँ, अहिले यही पेसाबाट जीवनयापन चलाइरहेकी छु’, थापाले भनिन्।

विज्ञापन

सुरुमा दुना–टपरी बेचेर पनि के जीविकोपार्जन होला भन्ने सोचेको उनी सुनाउँछिन्। ‘जब यो पेसा अँगाल्दै गएँ, अहिले मासिक रु २० हजार आम्दानी गर्ने भएकी छु’, उनले भनिन्।

विज्ञापन

लालीगुराँस दुना–टपरी उद्योग नै दर्ता गरेर उनले व्यवसाय सञ्चालन गरेकी छन्। सुरुआती चरणमा ६ जना महिला मिलेर खोलेको उद्योग भए पनि अहिले उहाँ एक्लैले चलाएकी छन्। ‘एक जना सदस्यको मृत्यु भयो, एक जनाको मेसिनले हात काट्यो, केही साथीले छाडे’, उनले भनिन्, ‘अहिले एक्लै उद्योग चलाएकी छु।’

सालको पातबाट बनाइने दुना–टपरीको खपत पनि राम्रै छ। जिल्लाका मुख्य बजार सदरमुकाम तौलिहवा, चार नम्बर, बहादुरगञ्जसम्म उनले बनाएर दुना–टपरी जाने गरेका छन्। हातैबाट दुना–टपरी बनाइने गरिन्छ। त्यसलाई राम्रो बनाउन मेसिनमा राख्ने गरिन्छ। रु एक लाख ५० हजारको लगानीमा उनले मेसिनसमेत खरिद गरेकी छन्।

पूर्व वडासदस्यसमेत रहेर काम गरेकी थापा व्यवसायमा जोडिएकै कारण जनप्रतिनिधि हुने अवसर पाएको बताउँछिन्। ‘गाउँलेबाट सालको पात खरिद गर्न थाले, यसले सम्पर्क विस्तार भयो, विसं २०७४ को स्थानीय तहको चुनाव उठेर जिते’, उनले विगत सुनाउँदै भनिन्, ‘दुना–टपरी उद्योगले मेरो व्यक्तिगत जीवनमा बदलाव ल्याएको छ।’

पटना क्षेत्रमा जङ्गल पर्याप्त छ। सालका पात पाउन खासै समस्या छैन। जङ्गलमा खेर जाने सालको पात सदुपयोग गरेर आम्दानी गर्दा उनी आफैँ दङ्ग छिन्। विशेषगरी उनले बनाएका दुना–टपरी घरायसी र व्यावसायिक प्रयोजनका लागि ग्राहकले लैजाने गरेका छन्। चाडपर्व, पूजा, विवाह तथा मृत्यु संस्कारमा पनि हरियो दुना–टपरीको माग हुने गरेको छ।

थापाले स्थानीयले ल्याएको सालको पात खरिद गर्ने गरेकी छन्। एक सय पातको रु ४० दिने गरेको उनले बताइन्। थापाले बेच्ने प्रतिदुना–टपरीको मूल्य आकारअनुसार सात रुपैयाँदेखि डेढ रुपैयाँसम्मको पर्छ। आफूले दुना–टपरी उद्योग सञ्चालन गरिरहे पनि स्थानीय सरकारबाट कुनै सहयोग नमिलेको उनले बताइन्। आफू जनप्रतिनिधि हुँदा पटक–पटक यो कुरा उठाए पनि सुनुवाइ नभएको उनको गुनासो छ।

‘स्थानीयस्तरमा सिकेको सीपलाई प्रोत्साहन गर्ने काम स्थानीय तहले गरेको छैन। दुना–टपरी बनाउँदा चाहिने क्वाइल भारतबाट ल्याउनुपर्छ, स्थानीय सरकारले सहयोग गरे राम्रो हुन्थ्यो’, उनले भनिन्। बजारमा छ्यापछ्याप्ती प्लास्टिकका साम्रगी पाइने गरेका छन्। पानीपुरी पसलदेखि मुख्य बजारका चोकचोकका रहेका ठेलागाडाले प्लास्टिक प्रयोग गर्ने गरेका छन्। त्यसले गर्दा वातावरण नै प्रदूषित हुने गरेको छ। सालका पातको प्रयोगले मानव स्वास्थ्यदेखि वातावरण सरसफाइमा समेत महत्त्वपूर्ण भूमिका खेल्छ।

स्थानीय पालिकाले प्लास्टिकका सामग्री निषेध गर्नुपर्नेमा उनको जोड छ। प्लास्टिकमुक्त पालिका बनाउन पनि यस्ता उद्यमीलाई प्रोत्साहन दिनुपर्छ। साथै उनले वाणगंगा नगरभित्र रहेका दुना–टपरीलाई एकीकृत गरी बिक्रीको प्रबन्ध मिलाइदिन आग्रह गरिन्।

canon

फेसबुक प्रतिक्रियाहरु

canon

चर्चामा

सम्बन्धित समाचार

सिफारिस