नेपाली कांग्रेसकी केन्द्रीय सदस्य डा. आरजु राणाले काठमाडौं महानगरपालिकाको प्रमुखमा टिकट लिएकी सिर्जना सिंहलाई घरघर पुगेर भोट माग्न सुझाव दिएकी छन्।

चाक्सीबारीमा आयोजित कार्यक्रमलाई सम्बोधनका क्रममा उनले सिर्जनालाई यस्तो सुझाव दिएकी हुन्।

विज्ञापन

‘तपाईंले टिकट पाउँदा म एकदमै खुसी छु। यो महानगर अरु निर्वाचन क्षेत्रभन्दा पनि ठूलो हो। काठमाडौंमा कतिवटा निर्वाचन क्षेत्र छन् मलाई थाहा छैन’, तर गणेशमान सिंह, मंगला आमा जस्ता नेता भएको परिवारकी तपाईंले कुशलतापूर्वक घर चलाउनु भयो। एकजना जेठाजु र तीनजना आमाजूलाई पनि चलाएर धानेर अघि बढेको मान्छे हो तपाईं। घर चलाउन एकदमै गाह्रो छ।’

विज्ञापन

उनले सिर्जनाले कुशलतापूर्वक महानगर हाँक्ने पनि बताइन्। ‘सिर्जनाले महानगर हाँक्छिन् भन्ने मलाई सय होइन, हजार प्रतिशत विश्वास छ। सिर्जनाले राजनीति छाडेको होइन। राजनीतिमै हुनुहुन्छ’, उनले भनिन्, ‘हामी महिलालाई कमजोर नठान्नु, पद नलिएको मात्रै हो। महिला हो, फलानोको श्रीमती हो भनेर कसैले अन्डर स्टिमेट नगरुन्।’

उनले सिर्जनालाई सिरियस ठानेर उम्मेदवारी दिएको बताइन्। ‘पार्टीको चिह्न पनि नहेर्नुस्, सिर्जना सिंहलाई हेरे भोट दिनुस्’, उनले थपिन्, ‘भोटरलाई नभेट्दा मैले हारेँ तपाईंले त्यसो नगर्नु। यस्ता सभाहरू धेरै नगरौँ म फसेको छु।’

उनले आफूलाई साथी र सहयोगीहरुले सभामै अल्मल्याएर राख्दा हारेको बताइन्। ‘साथीहरुले माया गर्ने, सभामा जाने तर भोटरकहाँ नजाने गर्दा म फसेँ। अब यस्ता सभाभन्दा घर घरमा गएर मतदाता भेटौँ’, उनले सुझाउँदै भनिन्, ‘मलाई त साथीहरुले घेरेर राखे, भोटरकहाँ पुग्न नसक्दा समस्या भयो। तर यहाँ घर घरमा पुगौँ।’