नायिका वर्षा राउतले फिल्म क्षेत्र सुरु गरेको आज ६ बर्ष पुरा भएको छ । फिल्म क्षेत्रमा ६ बर्ष बिताएकी वर्षाले आफू यो क्षेत्रमा छु भन्न पाउँदा गर्व लागेको बताएकी छिन् । दर्शकबाट पाएको माया, मिडियाबाट पाएको साथ र आलोचना सबैलाई आफूले मनमा राखेको भन्दै उनले खुशी व्यक्त गरेकी छिन् ।

फिल्म ‘नाई नभन्नु ल ४’बाट करिअर सुरुवात गरेकी वर्षाले सफलताको ह्याट्रिक समेत गरेकी थिइन् । डेब्यू फिल्म नै हिट भएपछि उनको ‘जात्रा र छक्का पन्जा’ पनि सुपरहिट भयो । यसपछि वर्षाले पछाडि फर्किएर हेर्नुपरेको छैन ।

विज्ञापन

वर्षाले करिअरमा ‘छक्का पन्जा २, जात्रै जात्रा’ जस्ता हिट फिल्म दिएकी छिन् । तर, सफलतासँगै उनको करिअरमा ‘चौका दाउ’ जस्तो असफल फिल्म पनि परेको छ ।

विज्ञापन

नेपाली फिल्म क्षेत्रमा वर्षा रुचाएकी नायिका हुन् । म्युजिक भिडियोबाट करिअर सुरुवात गरेकी वर्षाले हिट फिल्मको चौथो सिरिजमा काम गरेरै आफूलाई पुष्टी गरिन् । यसपछि, प्रदीप भट्टराई, दीपकराज गिरी जस्ता मेकरको साथ पाउँदा उनको करिअर झनै चम्कियो ।

वर्षाको हातमा ‘के घर के डेरा, लाखे’ जस्ता फिल्म छन् । म्युजिक भिडियोमा पनि उनको करिअर लकडाउन अगाडिसम्म सफल थियो । तर, लकडाउनपछि भिडियो बजारमा वर्षाको माग घटेको छ ।

पहिलो चरणको लकडाउनमा ‘नेपाल र भारतको सम्बन्ध’को बिषयमा दिएको अभिव्यक्तिले भने वर्षा लामो समय विवादमा रहिन् । यसपछि, उनलाई त्यो विवादबाट बाहिर निस्किएर करिअरलाई पुरानै तरिकाले अगाडि बढाउन समस्या परिरहेको छ ।

नायक तथा व्यापारी संजोग कोइरालासँग ६ बर्ष लामो प्रेम सम्बन्धपछि वर्षाले ३ बर्ष अगाडि बिहे गरेकी थिइन् । ६ बर्ष लामो फिल्म क्षेत्रको यात्रामा वर्षाले हिट फिल्म दिएपनि उनको करिअरलाई भने औषत सफल भएको विश्लेषण गर्न सकिन्छ ।