बुटवल।

नेकपा एमालेका उपमहासचिव तथा प्रचार विभाग प्रमुख पृथ्वीसुब्बा गुरुङले पार्टीका जनवर्गीय संगठनको वर्गीय संयुक्त मोर्चालाई सशक्त बनाउन सकेमात्रै एमाले बलियो बन्ने बताएका छन्। प्रेस चौतारी नेपालको केन्द्रीय बैठकमा उनले भने, ‘पार्टीलाई बलियो र सशक्त बनाउन जनसंगठन बलियो र सशक्त बन्नुपर्छ।’

विज्ञापन

गुरुङले जनवर्गीय संगठन ‘बोस’ उत्पादन गर्नेजस्तो खराब प्रवृत्तिका रूपमा अगाडि बढ्न थालेको बताए। एमालेले आफ्ना जनवर्गीय संगठनलाई ‘बोस’ उत्पादन गर्ने नभई कमरेड र नेता बनाउने संगठनको रूपमा विकास गर्नुपर्ने उनले बताए। ‘जनसंगठनले बोस, दाइ वा बा बनाउने होइन, कमरेड बनाउने हो, नेता बनाउने हो,’ गुरुङले भने।

विज्ञापन

उनले पार्टी र कार्यकर्ताबाट हार खाएर माधव नेपालले पार्टी त्यागेको टिप्पणी पनि गरे। नेता गुरुङले नेपालले एमालेलाई आरोप लगाए पनि विकल्प भने दिन नसकेको बताए। ‘माधव नेपालले पटक-पटक विभिन्न आरोप लगाउनुभयो तर विकल्प कहिल्यै दिनुभएन,’ उनले भने, ‘अन्तिममा पार्टी र कार्यकर्ताबाट हार खाएर एमाले नै त्याग्नुभयो।’

गुरुङले नेता नेपाल नेतृत्वको पार्टीको कुनै भविष्य नभएको दाबी गरे। मुलुकलाई नेतृत्व दिने पार्टी एमाले एमाले मात्रै भएको उनको भनाइ थियो। ‘केपी ओली जस्तो दृढ संकल्प बोकेको नेताले नेतृत्व गरेको पार्टी हो एमाले। हिजो माधव नेपालले नेतृत्व गर्दा एमाले कमजोर बनेको थियो, अहिले एमाले बलियो बनेको छ। अहिले जुन खालको नीति एमालेले लिएको छ, यसले एमाले मुलुकको थप बलियो पार्टी बन्ने छ,’ उनले भने।