काठमाडौं । 

प्रमुख प्रतिपक्षी दल नेकपा एमालेका अध्यक्ष केपी शर्मा ओलीले पालिका अधिवेशनमा सहमतिबाटै नेतृत्व चयन गर्न निर्देशन दिए पनि ओलीपक्षकै नेता महेश बस्नेतको गृहजिल्ला भक्तपुरमा पदका लागि रडाको मच्चिएको छ ।

विज्ञापन

विज्ञापन

देशैभर पालिका अधिवेशन उद्घाटन भएको लामो समय बितिसक्दा समेत भक्तपुरका ४ वटै नगरपालिकामा नेतृत्व चयन हुन सकेको छैन ।

नेकपा एमालेको भक्तपुर, मध्यपुरथिमि, सूर्यविनायक र चाँगुनारायण नगरपालिका अधिवेशनमा पदका लागि हानथाप देखिएको छ । गत बुधवार ४ वटै पालिकामा सुरू भएको बन्द सत्रले नेतृत्व चयन गर्न सकेको छैन ।

एमाले भक्तपुरका जिल्ला अध्यक्ष वचन देउजाले नगरपालिकाहरूमा सहमतिको प्रयास भइरहेको जानकारी दिए । ‘सकेसम्म चुनाव नगर्ने र सबैको सहमतिमा सर्वसम्मति नेतृत्व चयन गर्ने प्रयास भइरहेको छ,’ उनले भने, उनले भने, ‘सहमति हुन नसके प्रजातान्त्रिक पद्धतिबाट निर्वाचनबाट नेतृत्व चयन गरिने छ ।’

एमाले चाँगुनारायण नगर कमिटीको अधिवेशनमा बन्द सत्र सुरू भएपछि नगर प्रमुख सोम मिश्रदेखि अधिकांश जनप्रतिनिधि, पार्टी अध्यक्ष देउजा लगायतले सहमतिको प्रयास गरे पनि सहमति हुन सकेको छैन ।

सूर्यविनायक नगरपालिकाको बन्द सत्रमा समेत सहमति हुन सकेको छैन । सबै वडाबाट २७५ प्रतिनिधि छनोट भएर आएकोमा नगर अधिवेशनका ७५ सिटका लागि सबैले उम्मेदवारी फाराम भरेपछि थप समस्या भएको नेताहरूले जनाएका छन् ।

४ वटै तहमा नेतृत्व मिलाउने प्रयासमा एमालेका नेता महेश बस्नेत, सोम मिश्र, जिल्ला अध्यक्ष देउजा, नेता वासुदेव थापा, मदनसुन्दर श्रेष्ठलगायत लागिपरेका भएपनि सहमति जुटिरहेको छैन ।

एमाले पार्टीको नयाँ विधानअनुसार नगर कमिटी ७५ सदस्यीय हुने भएको छ । कमिटीको पदाधिकारीमा अध्यक्ष, उपाध्यक्ष, सचिव र २ उपसचिव चयन हुने जनाइएको छ । जसमध्ये ३३ प्रतिशत महिला अनिवार्य रहनुपर्ने र पदाधिकारीमा १ महिला अनिवार्य हुनुपर्ने व्यवस्था समेत गरिएको छ ।