चितवन।

नेकपा (माओवादी केन्द्र)का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ले प्रमुख प्रतिपक्षी दल नेकपा (एमाले)लाई संसद छोडेर जनतामा जान चुनौति दिएका छन् ।

विज्ञापन

प्रेस सेन्टरले आज विहान भरतपुर विमानस्थलमा गरेको पत्रकार सम्मेलनमा बोल्दै अध्यक्ष प्रचण्डले लगातार संसद अवरुद्ध गर्दै आएको एमालेसंग संसद अवरुद्ध गर्ने नैतिक र राजनीतिक अधिकार नभएको बताए । ‘आफैले पटक–पटक विघटन गरेको संसद अवरुद्ध गर्ने एमालेलाई अधिकारी छैन, बरु संसद छोडेरै गए त भइहाल्यो, विरोध नै छ भने त जनतामा गए हुन्छ’–अध्यक्ष प्रचण्डले भने । उनले एमालेसंग संसद अवरुद्ध गर्नमा कुनै तर्क, तथ्य पनि नभएको बताए । ‘संसद अवरुद्ध गर्नुको कुनै न तर्क छ, न त कुनै तथ्य नै, संसद विघटनलाई जायज पुष्टि गर्नका लागि मात्रै संसद अवरुद्ध गरिरहेको हो ।’–अध्यक्ष प्रचण्डले भने ।

विज्ञापन

यस्तै अध्यक्ष प्रचण्डले सत्ता घटक मन्त्रीपरिषद् विस्तारमा न्यायलाई भागबण्डा नगरेको स्पष्टीकरण समेत दिएका छन् । नेपाली कांग्रेसको कोटाबाट गजेन्द्र हमाल उद्योग वाणिज्य तथा आपूर्ति मन्त्री बनेको भन्दै अनावश्यक हो हल्ला गर्नुको तुक नभएको प्रचण्डको भनाई थियो । संसद नभएको व्यक्ति ६ महिनासम्म मन्त्री बन्न पाउने संवैधानिक व्यवस्था भएकाले सोही अनुरुप मन्त्री बनाइएको बताए । उनले संसद विघटनदेखि नै आफूहरुले सेटिङ सेटिङ भन्दै आएकाले अहिले अरुले पनि त्यही शब्द प्रयोग गर्न थालेको बताए । अध्यक्ष दाहालले लामो समयपछि पूर्ण आकारमा मन्त्रीपरिषद् विस्तार हुनु नै सकरात्मक पक्ष भएको बताए ।

अध्यक्ष दाहालले माधव कुमार नेपाल नेतृत्वको नेकपा (एकीकृत समाजवादी)संग तत्काल पार्टी एकता नहुने भन्दै निर्वाचनसम्म तालमेल गरेर जाने राम्रो समझादारी बनेको बताए । उनले चितवनमा पनि समझादारीका साथ अघि बढ्ने बताए । हेलिकप्टर मार्फत चितवन आएका प्रचण्ड आजै नवलपरासी जाँदै छन् ।